ئەو سەرچاوەی داهاتانەی بۆ زەکات کۆدەکرێنەوە.

بەناوی خوای بەخشندە و میهرەبانەوە سوپاس و ستایش بۆ پەروەردگاری جیهانیان، وە درود و ڕەحمەت بۆ سەر گیانی پاكی پێغەمبەر ﷺ و گشت كەس و یاران و شوێنكەوتوانی بەگشتی. وەڵام: سەبارەت بە پرسیارەكەی بەڕێزتان: ئینسان چەند سەرچاوەی دارایی هەبێ بەڕێزان لە زەکاتدا کە زەکات ئەدا هەموو سەرچاوە داراییەکان وەک یەک ئەژمار ئەکرێن، وە ئاڵتون و زیویش لەگەڵ پارە وەک یەک ئەژمار ئەکرێن، واتە ئەم بەڕێزە چەند پارەی هەیە نیسابەو ساڵی بەسەردا تێپەڕبووە وە چەنیش داهاتی هەبووە لە کۆی ئەمانە زەکات ئەدا، وە حەتتا ئاڵتون و زیویش ئەگەر بە تەنیا بۆ نموونە دە مسقاڵ ئاڵتونی هەیە کە زەکاتی ناکەوێ، بەڵام چل وەرەقەیشی هەیە کە دیسان زەکاتی ناکەوێ، چل وەرەقە و دە مسقاڵەکە کۆئەکرێنەوە بەیەکەوە زەکات تەواو ئەکەن ئەبێ زەکاتیان بدرێ ئەگەر ساڵیان بە سەردا تێپەڕ بووبێ، لەبەر ئەوە بابەتی پارە و سەرچاوەی داهاتی ئینسان لە هەر شوێنێکەوە بێ بە هەموویان کۆ ئەکرێتەوە وە هەموویان نیسابیان بۆ حسێب ئەکرێ وە لە هەموویان زەکات ئەدرێ، بۆ بابەتی ئاڵتون و زیویش هی پیاو بن هی ژن کەسەکە بەو شێوازە جەمعی ئەکا وە زەکاتی ئەدا. خوای گەورەش زاناتره