ڕێژەی زەکاتی مانگا و گامێش

بەناوی خوای بەخشندە و میهرەبانەوە سوپاس و ستایش بۆ پەروەردگاری جیهانیان، وە درود و ڕەحمەت بۆ سەر گیانی پاكی پێغەمبەر ﷺ و گشت كەس و یاران و شوێنكەوتوانی بەگشتی. وەڵام: سەبارەت بە پرسیارەكەی بەڕێزتان: مانگا ئەو مانگایانەی کە گوتمان هی بە خێوکردنە و ساڵ زیاترەو لە دەشت ئەلەوەڕێ و بەسەر هەبووەکەدا ساڵێک تێپەڕیوە، لە (30) سەر مانگا زەکات دەکەوێ، کە گوتمان (30) سەرمانگا واتە بە گوێرەکەکانەوە، کە بوو بە (30) سەر ئەو کاتە گوێرەکەیەک کە یەک ساڵی تەواو کردبێ زەکاتی ئەکەوێ، کە بوو بە (40) سەر ئەو کاتە هەر یەک سەر زەکاتەکەی ئەدرێ، بەڵام یەک سەرەکە ئەبێ ئەو کاتە ئەو حەیوانەی کە ئەدرێ پێی ئەوترێ موسیننە، واتە دوو ساڵی تەواو کردووە پێی ناوەتە سێ ساڵ، لە (60) سەر تا (69) سەر (2) گوێرەکەی یەک ساڵی تەواو کردبێ ئەدا بە زەکاتەکەدا، لە (70) بۆ (79) سەر (2) حەیوان ئەدا بە زەکاتەکەدا، یەکیان یەک ساڵی تەواو کردبێ، با بڵێین دوو نیون، دوو گوێرەکە، دوو مانگا، یەکیان یەک ساڵی تەواو کردبێ پێی ناوەتە دوو، یەکیان دوو ساڵی تەواو کردووە پێی ناوەتە سێ، ئەمە تا (79) سەر، لە (80) بۆ (89) سەر ئەو کاتە (2) مانگا ئەدا بە زەکاتەکەدا کە دوو ساڵی تەواو کردووە پێی ناوەتە سێ ساڵ، لە (90) بۆ (99) سەر مانگا ئەو کاتە (3) گوێرەکە کە یەک ساڵی تەواو کردووە پێ ناوەتە دوو ساڵ، تا (99) سەر ئەمە ئەدا بە زەکاتەکەدا، لە (100) تا (109) ئەوکاتە دوو گوێرەکە کە یەک ساڵی تەواو کردبێ، لەگەڵ گوێرەکەیەک یان مانگایەک کە دوو ساڵی تەواو کردبێ و پێی ناوەتە سێ ساڵ، بەم شێوازە زەکاتی مانگا دەر ئەکرێ، وە گامێش وەکوو مانگا مامەڵەی لەگەڵدا ئەکرێ، بزن وەکوو مەڕ مامەڵی لەگەڵدا ئەکرێ، کەواتە ئەمە زەکاتەکەیەتی. ئینجا ئەمێنێتەوە سەر جنسی ئاژەڵە بەخێوکراوەکان، ئەگەر ئەمانە جوانەگا بوون نێر بوون ئەو کاتە لە خودی ئەوان زەکاتەکە دەردەکرێ، ئەگەر مانگا بوون لە خودی مانگەکان زەکاتەکە دەرئەکرێ، ئەگەر مەڕ بوون لە خودی مەڕەکان، ئەگەر بزن بوون لە خودی بزنەکان، بەم شێوازە مامەڵە لەگەڵ زەکاتی ڕەشە وڵاخەدا ئەکرێ خوای گەورەش زاناتره