بوونی تەڕی و ئیلتیهاباتی بەردەوامی ئافرەتان

بەناوی خودای بەخشندە و میهرەبان؛ سوپاس و ستایش بۆ پەروەردگاری جیهانیان و دروود و ڕەحمەت بۆ سەر گیانی پاكی پەیامبەر (ﷺ) و گشت كەس و یاران و شوێنكەوتووانی بەگشتی. سەبارەت بە وەڵامەكەی بەڕێزتان: ئێمە دەڵێین بەڕێزان؛ لە شەرعدا و بەگوێرەی ئەو گۆڕانکارییە جەستەییانەی کە ژن پێیدا تێپەڕ دەبێت هەموو مانگێک سووڕی مانگانە دەبینێت، ئەم سووڕە کەمترین ماوەی شەو و ڕۆژێکە، زۆرترینیشی درێژ دەبێتەوە بۆ دوو هەفتە یان پازدە ڕۆژ، کەمترین ماوەش لەنێوان بینینی دوو خوێندا بریتییە لە پازدە ڕۆژ، ئەم بناغانە دەتوانین وەک شێوە گشتییەکە وەربگریت. کەواتە ئەو ژنەی کە بەمشێوازە تووشی تێکچوون و سەرلێشێوان دەبێت لە سووڕی مانگەکاندا؛ پێشتر سووڕە مانگانەکانی چۆن بووە و ئەو خوێنەی لەوکاتەدا کە سووڕی مانگانەی بینیوە ئەوە خوێنی سووڕەکەیەتی و دوو ڕۆژ پێشتر و پاشترە، هەربۆیە خوێنی بە خوێنی سووڕی مانگانە هەژمار دەکرێت، کە لەم خوێنی سووڕی مانگانەیەدا پاکدەبێتەوە؛ هەتا پازدە ڕۆژی دیکە هەر خوێنێک ببینێت بە سووڕی مانگانە هەژمار ناکرێت، لە دوای پازدە ڕۆژەکە ئەگەری هەیە ببێتەوە بە سووڕی مانگانە، ئەوەش دەمێنێتەوەسەر ماوەی خوێنبینینەکە، ئەگەر کاتژمێرێک خوێنی هەبوو و دواتر خوێنەکە نەما؛ دوای پێنج ڕۆژ خوێن دەبینێتەوە، ئەم خوێنانە بە سووڕی مانگانە هەژمار ناکرێن؛ بەڵکوو ئەم خوێنانە خوێنی (نەزیفن) و خوێنێکی ناسروشتییە، ژن بەئاسایی دەتوانێت نوێژی خۆی بکات ئەگەر خوێنەکە بەردەوام بوو، بەڵام بۆ هەموو نوێژێک دەستنوێژێک دەگرێتەوە و نوێژەکانی خۆی دەکات. خوای گەورەش زاناتره