حوکمی بینینی خوێن پێش منداڵبوون بەچەند ڕۆژێک

بەناوی خودای بەخشندە و میهرەبان؛ سوپاس و ستایش بۆ پەروەردگاری جیهانیان، دروود و ڕەحمەت بۆ سەر گیانی پاكی پەیامبەر (ﷺ) و گشت كەس و یاران و شوێنكەوتووانی بەگشتی. سەبارەت بە وەڵامەكەی بەڕێزتان: مەبەست لە خوێنی پێش لەدایکبوون ئەو خوێنەیە کە ئەگەر ژنێک لە ڕۆژێکەوە هەتا سێ ڕۆژ پێش لەدایکبوونی منداڵەکەی خوێنی لێبێت. ئەم خوێنە لای شافیعی و حەنەفییەکان بەوجۆرە باسدەکرێت کە هەمان خوێنی پاش منداڵبوون نییە؛ چونکە لای ئەوان ئەو خوێنەی کە پێی دەگوترێت (نیفاس) لەدوای منداڵبوونەوە دەستپێدەکات، بەڵام بۆچوونی دروست ئەوەیە کە هەر خوێنێك لە سەروبەندی منداڵبووندا ژن بیبینێت؛ واتە بەر لە وادەی منداڵبوونەکەی بە ڕۆژێک یان دوو ڕۆژ خوێنی هەبێت، هەمان حوکمی خوێنی دوای منداڵبوونەکەی هەیە. بەڵام بۆ؟ چونکە هۆکاری خوێنەکە بوونی منداڵ و کرداری لەدایکبوونەکەیە، کەواتە ئێمە دەڵێین لەبنەڕەتدا وایە کە ژن ئەم خوێنەی نییە، بەڵام ئەگەر وەک ئەگەریاتێک ڕوویدا؛ ئەوکاتە بۆچوونی دروست ئەوەیە کە ئێمە مادام ئەم خوێنە بە هۆکاری لەدایکبوونی منداڵەکە دەزانین، ئینجا لەپێش لەدایکبوونی منداڵەکە بە ڕۆژێک دوو ڕۆژ یان لەدوای لەدایکبوونی منداڵەکە ڕاستەوخۆ خوێنەکە دەستپێبکات، ئێمە دەڵێین هەمان حوکمی خوێنی هەیە و ئەو ژنە مامەڵەی ژنێکی لەگەڵدا دەکرێت کە خوێنی منداڵبوونی هەیە. خودای گەورەش زاناترە.