تێپەڕبوونی سووڕی مانگانە لەماوەی ئاسایی خۆی

بەناوی خوای بەخشندە و میهرەبان؛ سوپاس و ستایش بۆ پەروەردگاری جیهانیان، دروود و ڕەحمەت بۆ سەر گیانی پاكی پەیامبەر (ﷺ) و گشت كەس و یاران و شوێنكەوتووانی بەگشتی. سەبارەت بە وەڵامەكەی بەڕێزتان: ئێمە دەڵێین ئەو خوشکە بەڕێزانەی کە هەر خوێنێك لە ڕۆژێکەوە هەتا چوار ڕۆژ دەبینن بەر لە سووڕی مانگانەکەیان؛ هەر بە سووڕی مانگانە هەژمار دەکرێت، مادام بابەتەکە گەیشتنە بە ماوەی سووڕی مانگانە، ئەویش بە یەک مەرج؛ ئەگەر هاتوو ئەم ژنە لەنێوان سووڕی مانگانەی کۆتاییدا؛ واتە کۆتا ڕۆژی سووڕی مانگانەی پێشووی چەند بووە و ئێستا کە خوێنی بینیوە چەندە؟ نابێت لەنێوان ئەم دوو خوێنەدا لە پازدە ڕۆژ کەمتر پاکبوونەوە هەبێت، ئەگەر لە پازدە ڕۆژ کەمتر پاکبوونەوە هەبوو و هەر خوێنێك لە ماوەی پازدە ڕۆژدا ببینرێت؛ بۆ دواجار پاکبوونەوە ڕووبدات، ئەم خوێنە بە خوێنی سووڕی مانگانە هەژمار ناکرێت؛ بەڵکوو بە خوێنی (نەزیف) هەژمار دەکرێت، خوێنی نەزیفیش ئەو حوکمەی هەیە کە ژن تێیدایە دوای بانگەکان، ئەگەر بەردەوام بێت؛ دوای بانگەکان دەستنوێژێک دەگرێت و دواتر نوێژی خۆی دەکات و هەرکارێکی هاوشێوەی سەرجێییکردن و قورئانخوێندن و ...هتد بکات هیچ کێشەی نییە، بەڵام ئەگەر دوای پازدە ڕۆژ ژنەکە پاکبووەوە و ئینجا جارێکی دیکە خوێنی بینی و سروشتیشی وابوو کە دوو سێ ڕۆژی ماوە بۆ سووڕی مانگانە؛ ئەم خوێنە بە سووڕی مانگانە هەژمار دەکرێت. هەروەها ئەو سووڕی مانگانەیە مەرجێکی تری هەیە کە ژنەکە دەبێت ئاگای لێبێت؛ ئەویش ئەوەیە ماوەی خوێنەکە شەو و ڕۆژێک بەردەوام بێت، چونکە بەگشتی ئەم کەسە لەوە دەچێت لەگەڵ هەموو چوونە سەرئاوێکدا ئەم خوێنەی هەبێت، کەواتە خوێنەکە بەردەوامی هەیە و لەمکاتەشدا وەکوو خوێنی سووڕی مانگانە مامەڵەی لەگەڵدا دەکرێت، ئەوەش ئاساییە؛ چونکە سووڕی مانگانەی ژنان بەئاسایی هەتا پازدە ڕۆژیش درێژ دەبێتەوە، واتە مەرج نییە هەتا حەوت بۆ هەشت ڕۆژ درێژ ببێتەوە، جاری وا هەیە گرفتی هۆرمۆنی بۆ دروستدەبێت، جاری وا هەیە ڕاڕاییەکی بۆ دروستدەبێت و کاریگەری لەسەر دادەنێت هەتا سووڕەکە پێش و پاش بکەوێت، بەپێی ئەو دۆخەش ڕۆژێک کەمتر و دوو ڕۆژی زیاتر ئەمانە ئاسایین لە سووڕی مانگانەدا، لەبەرئەوە بەڵێ بە سووڕی مانگانە هەژمار دەکرێت. خوای گەورەش زاناتره